تخصصي ،،،

حبيبتي الغالية سارة هذا مستقبلش انتين واذا كنتين اتحبين الانجليزي على قولش يعني مدرسة انجليزي يعني ادبي لغات او تجاري لان اكثر المواد بالانجليزي وفي النهاية هذا قرارش

تحياتي عمتك المحبة ام لؤي

امممممم..... مثل ما قالت خالو هذا يعتمد على ميولش ..

بس اذا كنتين تبين الشي المطلوب أكثر .. فهو التجاري ... أولا التجاري مو صعب واجد وفيه انجليزي .. وانشاالله اذا تخرجتين من المدرسة ودخلتين الجامعه ماتحصلين صعوبة ...

غير جذي وهو طبعا مو تشجيع لج ولا الى غيرج (جهالو) بس حتى لو حبيتين تشتغلين وتدرسين في الجامعه في نفس الوقت يعني تعتمدين على روحج في المصاريف واجد بتحصلين فرص لانج بتكونين متخرجه من تجاري ..

واعتقد والله اعلم .. هو مطلوب واجد في سوق العمل .. يعني فرص انج تحصلين شغل بعد ماتكملين جامعه اكثر من اي تخصص ثاني ...

وانشاالله بالتوفيق

والله انا بعد يا ناس محتار

1.انا احين مسجل ريض وفيز بس ما ادري ويش اسوي

اسال صبيان مال تجاري عن الاساتذه يقولون كلش ما يعرفون شي

وانا اصلان كلش ويا استاذ الاول مال المواد التجارية

ما اطيقه

فويش تقولون رايكم احنا في حاجه الى رايكم

ارجو اني اخترت المسار الصحيح

ادعو لنا بالنجاح ............

في البداية

بالنسبة الى سارة
مثل ما قالوا الباقي هذا يعتمد على رغبتش و شنو انتين تتمنين تصيرين في المستقبل
بالنسبة الى التجاري
هو واجد مطلوب في السوق
و حتى لو ما حصلتين شغل بعد ما تتخرجين من الجامعة
راح يكون بأمكانش تفتحين ليش مشروع صغير و ان شاء الله بيكبر مع مرور الوقت

بالنسبة الى التخصصات العلمية
فهذه بعد على الميوول
يعني مو شروط حصلين ليش شغل
لانه ما شاء مملكتنا الحبيبه ما تقدر العلماء
لكن لو بتدرسين و بتشتغلين اي شئ علوم سواء كان : ريض , فيز , كيم , احياء ... بره البحرين
يسووون ليش الف حساب و معاااااشش
اه خليها على الله

الهمه سارة و احمد شووفوا انتون شونوا تبون تصيرون في المستقبل علشان تقدرون تحددون تخصصكم بس الحين لما تقوولون اني/انا ما احب هذا الماده و احب هذه المادة هذا ما بيفيدكم لانه بعد سنتين وراح تدخلون على عالم غيييرررر

سوووري طولت عليكم

بالتوفيق ان شاء الله
و اذا احتجتون اي شئ ترى حاضره

نسيت اقووول ليكم ان ما في شئ في هالدنيا سهل و لا في شئ صعب

اذا الشخص يحب الشئ و يتمنى يدرسه مهما كان صعب راح يشووفه اسهل شئ
و اذا الشخص ما يحب الشئ مستحيل يشوفه سهل مهما كان اسهل شئ في الدنيا

بس خلصت

صح كلام ام الخير ... في اشياااء ناس يشوفونها صعبه ومايقدرون يدرسونها .. بس عن بعض الناس هي سهل مافي اسهل منها ...
لان الواحد اذا يحب الشي .. يحب يتفوق فيه .. ويحب يتعب عليه ..

مثلا: اني ماحب شي تجاري .. يعني كلش كلش مخي مايشتغل في هذه الأشياء ... يمكن لاني علمي ويمكن لان ميولي كلش بعيده عن التجاري ..... >>> من جذي مخي فاضي فيه لا افهمه ولا ابي افهمه ..
ونفس الشي العربي ...>> اكوو الحين ماخذه ماده بالعربي وماعندي غيرها وحددي متورطه لان مو ميولي .....

باختصار ومابي اطول عليكم ...
شوفوا الشي الي انتون تحبونه ويناسبكم .. لان مو شرط الي احنا نشوفه او يناسبنه ويسناسب ميولنه يناسبكم انتون بعددد !!

احنا اهني في لمنتدى كل واحد ميوله مختلفة عن الثاني مثل افكارنه واختلافها بالضبط ..

فكروا زززين .. قبل لا تخطون اي خطوه .. لان كل خطوة الحين تخطونها ..>> يعني الف خطوة باجر بتتقدمون فيها

اوكي انشاء الله نتوفق
بس نبي دعائكم